• ब्रह्मदेव यादव, विराटनगर ७६१  पटक हेरिएको

सोमबार, आश्विन २१, २०८१ समय : १६:०८:५९ , २ महिना अगाडि

उद्योग संगठन मोरङले विराटनगरमा आयोजना गर्न लागेको विराट एक्स्पोको तयारी सुरु गरेका छन् । उद्योग संगठन मोरङले २०८१ साल पुस ७ गतेदेखि १६ गतेसम्म विराटनगर–१४ जतुवा स्थित डिग्री क्याम्पसको मैदानमा विराट एक्स्पोको आयोजना गर्न लागेको हो । उद्योग संगठन मोरङले २०७९ साल पुस महिनामा डिग्री क्याम्पसकै मैदानमा विराट एक्स्पोको आयोजना गरेका थिए । अपार सफलता पछि संगठनले पुनः डिग्री क्याम्पसकै मैदानमा विराट एक्स्पोको आयोजना गर्ने तयारी थालेका छन् ।

२०७९ सालमा सुयश प्याकुरेल उद्योग संगठन मोरङको अध्यक्ष रहेको बेला विराट एक्स्पोको आयोजना गरेका थिए । जुन एक्स्पोले अत्याधिक उपभोक्ता एवं दर्शक बटुल्न सफल भएको थियो । २०८१ सालमा राकेश सुराना संगठनको अध्यक्ष रहेको बेला विराट एक्स्पो आयोजना गर्ने तयारी थालेका छन् । उद्योग संगठन मोरङले विराटनगर–१४ स्थित डिग्री क्याम्पसको मैदानमा लगातार ३ पटक सम्म विराट एक्स्पो आयोजना गर्ने क्याम्पस प्रशासन सँग सम्झौता गरेका छन् ।

त्यस वापत संगठनले डिग्री क्याम्पसको चारै तर्फ खुल्ला रहेको क्षेत्रलाई ३५ लाख भन्दा बढि रकम खर्चेर पर्खाल लगाउने सम्झौता गरेका छन् । उद्योग संगठन मोरङले २०७९ सालमा विराटनगर–१४ जतुवा स्थित डिग्री क्याम्पसको मैदानमा पहिलो पटक विराट एक्स्पोको आयोजना गर्दा अत्याधिक मात्रामा उपभोक्ता एवं दर्शक बटुल्न सफल भएका थिए ।

संगठनले त्यतिखेर एक दर्जनको हाराहारीमा बस भाडामा लिएर मोरङ जिल्लाको विभिन्न स्थानबाट सर्वसाधारणलाई विराट एक्स्पो स्थलसम्म ल्याउने र पुर्‍याउने काम गरेका थिए । जसको कारण विराट एक्स्पोले अपेक्षा गरेभन्दा बढि उपभोक्ता एवं दर्शक बटुल्न सफल भएका थिए । यतिखेर संगठनको अध्यक्ष रहेका राकेश सुरानाले पुरानै सफलता र इतिहास दोहोराउने गरी विराट एक्स्पोको आयोजना गर्न लागेका छन् ।