- चिरफार डटकम, विराटनगर ६६९ पटक हेरिएको
शुक्रबार, आश्विन १८, २०८१ समय : १७:४८:०८ , ३ महिना अगाडि
नेपाल अग्रवाल महिला मञ्च विराटनगरको सहयोगमा राष्ट्रिय वाणिज्य बैंकको विराटनगर शाखा कार्यालयमा खानेपानी मेसिन जडान गरिएको छ । बाटो हिड्ने सर्वसाधारणका लागि सहज र सरल तरिकाले खानेपानी खान पाइयोस् भन्ने उद्देश्यका साथ २ लाख भन्दा बढि रुपैयाँ खर्चेर नेपाल अग्रवाल महिला मञ्चले राष्ट्रिय वाणिज्य बैंक विराटनगर शाखा कार्यालय अगाडि खानेपानी मेसिन जडान गरिएका हुन् ।
विराटनगर महानगरपालिकाका पूर्वमेयर तथा नेपाली कांग्रेसका केन्द्रिय सदस्य एवं कोशी प्रदेश सांसद भीम पराजुली, नेपाल अग्रवाल सभा विराटनगरका अध्यक्ष राजकुमार अग्रवाल, सभाका पूर्व अध्यक्ष देवकिनन्दन अग्रवाल, नेपाल अग्रवाल महिला मञ्च विराटनगरका अध्यक्ष उमा चौधरी, नेपाल अग्रवाल युवा मञ्च विराटनगरका अध्यक्ष चेतन अग्रवालले शुक्रबार राष्ट्रिय वाणिज्य बैंक विराटनगर शाखा कार्यालय बुधहाट चौकमा जडान गरिएको वाटर चिलिङ प्लान्टको शुभारम्भ गरे ।
कार्यक्रममा राष्ट्रिय वाणिज्य बैंक कोशी प्रदेशका उपप्रमुख कमला तिम्सिना, विराटनगर शाखाका प्रवन्धक हेमराज मराठा, नेपाल अग्रवाल कन्या मञ्च विराटनगरका अध्यक्ष मेघी तोदी सहित समाजका विशिष्ट व्यक्तिहरुको सहभागिता रहेको थियो ।
उमा चौधरीले नेपाल अग्रवाल महिला मञ्च विराटनगरको अध्यक्षको नेतृत्व सम्हालेपछि समाज परिवर्तनको हरेक क्षेत्रलाई सहयोग पुग्ने गरी काम गरिरहेका छन् । जुन कामलाई अगाडि बढाउन नेपाल अग्रवाल सभा विराटनगरका पूर्वअध्यक्ष उद्योगी एवं समाजसेवी देवकीनन्दन अग्रवालले निरन्तर मार्ग दर्शन गरिरहेका छन् ।
