• ब्रह्मदेव यादव, विराटनगर ८०१  पटक हेरिएको

शुक्रबार, फाल्गुण ०४, २०८० समय : १६:०९:५० , ९ महिना अगाडि

नेपाल अन्तर्राष्ट्रिय कृष्ण भावनामृत संघ (इस्कोन) ले फागुन ७ गते विराटनगरमा रथयात्रा निकाल्ने तयारी गरेको छ । इस्कोनको मोरङ जिल्ला समिति र विराटनगर महानगर समितिले शुक्रबार विराटनगरमा पत्रकार सम्मेलन गरेर रथयात्रा निकाल्ने तयारी अन्तिम चरणमा पुगेको जानकारी गराएको छ । इस्कोन मोरङका अध्यक्ष क्रान्तिस शर्मा र विराटनगर उपाध्यक्ष भानुभक्त जोशीले भारतको जगन्नाथ पुगेर भगवान जगन्नाथ रथयात्राको अवलोकन गर्न नसक्ने भक्तजनका लागि विराटनगरमा नै दर्शन एवं अवलोकन गर्ने उद्देश्यका साथ रथयात्रा निकाल्न लागिएको जानकारी गराए ।

फागुन ७ गते सोमबार विराटनगरमा निकालिने रथयात्रामा २ हजार भन्दा बढि सनातन हिन्दु धर्मावलम्बीहरूको सहभागिता रहने इस्कोनका मोरङ अध्यक्ष क्रान्तिस शर्माले बताए । पत्रकार सम्मेलनमा रथयात्रा आयोजक समितिका संयोजक, समाजसेवी गणेशप्रसाद राठी र इस्कोन विराटनगर महानगर समिति सदस्य निर्मला खत्रीको सहभागिता रहेको थियो । डा. मदन कोइरालालाई रथयात्रा आयोजक समितिको सल्लाहकारमा राखिएको छ ।

सोमबार बिहान १० बजे विराटनगरको रामजानकी मन्दिरबाट निस्कने रथयात्रा बजार क्षेत्रको परिक्रमा गर्दै पुनः रामजानकी मन्दिरमै पुगेर समापन हुनेछ । इस्कोन नेपाल क्षेत्रका सचिव स्वामी पत्री प्रभुजीको प्रमुख आतिथ्यतामा रथयात्रा निकाल्ने तयारी भई रहेको आयोजक समितिले जानकारी गराएको छ । रथयात्रा कार्यक्रम पश्चात इस्कोनका विश्व प्रसिद्ध गुरु स्वामी पत्री प्रभुजी र नेपाली युवामाझ लोकप्रिय इन्जिनियर रुपेश्वर गौरले इस्कोन बारे आध्यात्मिक प्रवचन दिने कार्यक्रम रहेको छ ।