- ब्रह्मदेव यादव, विराटनगर २५५ पटक हेरिएको
आइतबार, बैशाख ०७, २०८२ समय : १७:३१:२५ , ६ घन्टा अगाडि
राष्ट्रिय प्रजातन्त्र पार्टी मोरङले आइतबार विराटनगरमा सिटी जुलुस निकालेका छन् । पार्टीका केन्द्रीय अध्यक्ष राजेन्द्र लिङदेन सहित ७ जना नेतालाई पक्राउ गरेको विरुद्ध राप्रपा मोरङले सिटी जुलुस निकालेर शक्ति प्रदर्शन गरेका छन् ।
साथै पार्टीका केन्द्रीय अध्यक्ष सहितका नेताहरूलाई पक्राउ पुर्जी आदेश दिने गृहमन्त्री रमेश लेखकको राजीनामा माग गरेका छन् । राप्रपा संसदीय दलको कार्यालय सिहदरवारमा आइतबार बैठक गरिरहेको बेला उनीहरूलाई जिल्ला प्रहरी परिसर काठमाडौँले पक्राउ गरेका थिए ।
अध्यक्ष राजेन्द्र लिङदेन, उपाध्यक्ष बुद्धिमान तामाङ, प्रवक्ता ज्ञानेन्द्र शाही र राष्ट्रिय युवा मोर्चाका अध्यक्ष कैलाश कटुवाललाई प्रहरीले नियन्त्रणमा लिएको छ । विराटनगरको गोल्छा चौकबाट निस्केको सिटी जुलुस ट्राफिक चौकमा पुगेर समापन भएको थियो ।
राप्रपा मोरङका अध्यक्ष गोपाल कटुवाल, केन्द्रीय सहप्रवक्ता दिनेशकुमार साह, केन्द्रीय सदस्य विश्वमाेहन थापा, मोरङ उपाध्यक्ष राजेश मास्के, मोरङ प्रवक्ता संजय विक्रम अधिकारी सिटी जुलुसमा सहभागी थिए । पार्टीका नेता मनोज बस्नेत, पर्शु सुवेदी, नरेश राई सहितका नेता कार्यकर्ताहरू सहभागी सिटी जुलुसले नगर परिक्रमा गर्दै गणतन्त्रका विरुद्ध नाराबाजी गरेका थिए ।
