- ब्रह्मदेव यादव, विराटनगर ७२९ पटक हेरिएको
शुक्रबार, चैत्र १४, २०८१ समय : १३:४९:१९ , ६ दिन अगाडि
श्रीहरि सत्संग समिति नेपालले विराटनगरमा आयोजना गरेको रासलीला कार्यक्रमबाट ११ लाख ६५ हजार रुपैयाँ आम्दानी गरेका छन् । जसबाट १० लाख १५ हजार रुपैयाँ खर्च भएका छन् । रासलीला कार्यक्रमको भव्य एवं ऐतिहासिक आयोजन सम्पन्न गरेर आयोजकले १ लाख ५० हजार रुपैयाँ बचत गरेका छन् ।
रासलीला कार्यक्रममा एक जना भक्तजनले सनातन धर्म प्रचार–प्रसार र रक्षाका लागि रथ किन्न १ लाख रुपैयाँ सहयोग गरेका छन् । श्रीहरि सत्संग समिति नेपालका अध्यक्ष समाजसेवी भिखमचन्द सरलले रासलीला कार्यक्रम आयोजनाबाट १० लाख रुपैयाँ बचत गर्ने र यसरी बचत गरिएको रकमबाट सहर र गाउँ–गाउँमा पुगेर सनातन हिन्दु धर्मको प्रचार–प्रसारका लागि रथ किन्ने वाचा गरेका थिए । समिति सँग यतिखेर दुईवटा रथ छन् । थप एक रथ किन्ने इच्छा रहेको थियो । तर लक्ष्यमा पुग्न सकिएन ।
श्रीहरि सत्संग समिति नेपालले विराटनगरमा २०८१ चैत ५ देखि १० गतेसम्म रासलीला कार्यक्रम आयोजना गरेका थिए । भारतको वृन्दावनबाट आएका २१ जना कलाकारहरूको टोलीले भगवान् श्री राधाकृष्णको जीवन शैलीमा आधारित रासलीला मञ्चन गरेका थिए । विराटनगरको अतिथि सदनमा आयोजना गरिएको रासलीला मञ्चन कार्यक्रममा १२ हजार भन्दा बढी भक्तजनहरू सहभागी भएका थिए ।
समितिले कोशी प्रदेशका उपाध्यक्ष व्यवसायी एवं वरिष्ठ समाजसेवी महेशकुमार साह स्वर्णकारलाई प्रमुख संयोजक र उद्योगी एवं समाजसेवी घनश्याम काबरालाई सह-संयोजकको जिम्मेवारी दिएर रासलीला कार्यक्रम आयोजना गरेका थिए । रासलीला कार्यक्रम भव्य एवं ऐतिहासिक रूपमा सम्पन्न भइसकेपछि समितिले बिहीबार विराटनगरमा बैठक राखेर आम्दानी र खर्च सार्वजनिक गरेका छन् । समितिले रासलीला कार्य सम्पादन समितिका ४१ जना पदाधिकारीलाई हार्दिक बधाई ज्ञापन गर्दै सम्मान गरेका छन् ।
समितिका केन्द्रीय अध्यक्ष भिखमचन्द सरल, महासचिव रामजीवन अग्रवाल, कोशी प्रदेश अध्यक्ष विद्यानन्द माझी, उपाध्यक्ष एवं रासलीला मुल आयोजक समितिका प्रमुख संयोजक महेशकुमार साह स्वर्णकार, सह–संयोजक घनश्याम काबरा, कोषाध्यक्ष भवानी बोहराले कार्यसम्पादन समितिका पदाधिकारीहरुलाई सम्मान पत्रले सम्मान गरेका थिए ।
