- ब्रह्मदेव यादव, विराटनगर ४९४ पटक हेरिएको
बुधबार, चैत्र १२, २०८१ समय : १४:२१:०२ , १ हप्ता अगाडि
गणतन्त्र विरुद्ध बुधबार विराटनगरमा नेपाली जनता सडकमा उत्रिएका छन् । सडकमा उत्रिएका जनताले नेपाल कम्यूनिष्ट पार्टी (एमाले) का अध्यक्ष एवं प्रधानमन्त्री केपी शर्मा ओलीका विरुद्ध देश छोड्न माग गर्दै उच्शृखल नाराबाजी गरेका छन् ।
पूर्व राजा ज्ञानेन्द्र शाहलाई पुर्नवहाली गर्नुपर्ने माग गर्दै बुधबार विराटनगरमा निकालिएको मोटरसाइकल र् यालीमा हजारौँ नेपाली जनता सडकमा उत्रिएका हुन् । राजेन्द्र लिङदेन अध्यक्ष रहेको राष्ट्रिय प्रजातन्त्र पार्टी र कमल थापा अध्यक्ष रहेको राष्ट्रिय प्रजातन्त्र पार्टी नेपालका नेता तथा कार्यकर्ताहरूको बाक्लो संख्यामा मोटरसाइकल र्यालीमा सहभागी भएका थिए ।
राष्ट्रिय प्रजातन्त्र पार्टीका केन्द्रीय महामन्त्री धवल शमशेर जबरा र प्रह्लादप्रसाद शाह, केन्द्रीय प्रवक्ता सगुन लावती राष्ट्रिय प्रजातन्त्र पार्टी नेपालका केन्द्रीय उपाध्यक्ष बल्लभप्रसाद दाहालले मोटरसाइकल र्यालीको नेतृत्व गरेका थिए । राष्ट्रिय प्रजातन्त्र पार्टीका केन्द्रीय सह प्रवक्ता दिनेशकुमार साह, मोरङ अध्यक्ष गोपाल कटुवाल, मोरङ प्रवक्ता संजय विक्रम अधिकारी र राष्ट्रिय प्रजातन्त्र पार्टी नेपालका कोशी प्रदेश अध्यक्ष माधव आचार्य, मोरङ अध्यक्ष कुमार ढकाल मोटरसाइकल र्यालीमा सहभागी थिए ।
विराटनगरको पुष्पलाल चौकबाट निस्केको मोटरसाइकल र्याली नगर क्षेत्रको विभिन्न भागको परिक्रमा गर्दै कञ्चनवारीमा पुगेर समापन भएको थियो । कञ्चनवारी चौकमा आयोजित मोटरसाइकल र्यालीको समापन समारोहमा राष्ट्रिय प्रजातन्त्र पार्टीका महामन्त्री धवल शमशेर जबराले पूर्व राजा सहित प्रजातन्त्रको पुर्नवहाली नभएको खण्डमा सत्ता सञ्चालन गरिरहेका राजनैतिक दलका नेताहरूलाई बङ्गलादेश र श्रीलंकाको जस्तै देश निकाला गर्ने बताए ।
जनताको बलमा पुर्व राजा सहित प्रजातन्त्र व्यवस्था ल्याउन लागेको महामन्त्री जबराले बताए । राष्ट्रिय प्रजातन्त्र पार्टीका केन्द्रीय प्रवक्ता सगुन लावतीले सामान्य रोजीरोटीको लागि विदेश जानु पर्ने अवस्था रहेकोले नेपालमा प्राप्त गणतन्त्रको उपलब्धि के हो भन्ने प्रश्न उठान गरेका थिए ।
