- ब्रह्मदेव यादव, विराटनगर ४७९ पटक हेरिएको
मंगलबार, चैत्र ११, २०८१ समय : १६:१०:४५ , १ हप्ता अगाडि
नेपाल कम्यूनिष्ट पार्टी (एमाले) को हरेक महाधिवेशन र अधिवेशनमा रुवावासी चल्न थालेका छन् । एमाले निकट पत्रकारहरूको संगठन प्रेस चौतारी नेपालको विराटनगरमा सम्पन्न १०औं महाधिवेशनमा रुवावासी चल्यो ।
महाधिवेशनमा अध्यक्ष पदका उम्मेदवार राजेश राई सहित उनका समूहका उम्मेदवारहरूले उम्मेदवारी नै दर्ता गराउन नसक्दा एमाले भित्र लोकतान्त्रिक प्रक्रिया खतम भइसकेको निष्कर्ष निकाल्दै रुवावासी गरेर असन्तुष्टि जनाए ।
नेकपा एमालेका अध्यक्ष एवं प्रधानमन्त्री केपी शर्मा ओलीले आफ्ना निकट संस्थापन पक्षधर नेताहरूलाई ठाडो निर्देशन दिँदै पार्टीको केन्द्रीय कमिटीले अनुमोदन गरेको नामावली अनुसार नेतृत्व चयन गर्न भनेका थिए ।
चौतारीको महाधिवेशन गराउने जिम्मेवारी पाएका नेताहरूले अध्यक्षका उम्मेदवार राजेश राई र उनको समूहलाई उम्मेदवारी नै दर्ता गर्न दिएन । उम्मेदवारी दर्ता गर्न नपाएपछि अध्यक्षका उम्मेदवार राजेश राई र उनका समूह रुवावासी गर्दै महाधिवेशन स्थलबाट बाहिरिए ।
राजेश राईले रुवावासीमा उत्रिएका समर्थकहरूको आँसु पुच्छदै पछि आफै रुवावासीमा उत्रिए र विराटनगरको महाधिवेशन स्थलबाट बाहिरिए । चौतारीको महाधिवेशनमा चलेको रुवावासीको भिडियो यतिखेर सामाजिक सञ्जालमा खुवै चर्चा बटुली रहेका छन् । यस अघि नेकपा एमाले मोरङको अधिवेशनमा रुवावासी चलेको थियो ।
एमाले मोरङको अधिवेशनमा संस्थापन पक्ष र संस्थापन इतर पक्ष चुनावमा उत्रिएका थिए । संस्थापन इतर पक्षधर विनोद ढकाल समूहले सानदार जित हासिल गरेपछि उपाध्यक्षमा निर्वाचित सागर थापाले पार्टी कार्यालयमा न्याय पाएको भन्दै खुसीमा रोएका थिए । थापा विराटनगर महानगरपालिका कमिटीको अध्यक्ष रहेको बेला नेकपा एमाले मोरङका पूर्व अध्यक्ष बाबुराम कार्कीले उनलाई पदबाट हटाएका थिए ।
