रमपम विराट गोल्ड कप फुटबल प्रतियोगिता, रिजालको मोरङ ११ र कलकता बिच पहिलो खेल

  • ब्रह्मदेव यादव, विराटनगर ३४१  पटक हेरिएको

आइतबार, फाल्गुण १८, २०८१ समय : १६:५०:१२ , १ महिना अगाडि

फागुन १९ गते सोमवारदेखि विराटनगरमा हुनगइरहेको ९औं संस्करणको रमपम विराट गोल्ड कप फुटबल प्रतियोगिता २०८१ को सम्पूर्ण तयारी पुरा भएको छ ।

रमपम विराट गोल्ड कप फुटबल प्रतियोगिता आयोजक समितिका संयोजक नविन रिजालले आइतबार पत्रकार सम्मेलन गरेर रिजालको मोरङ ११ फुटबल क्लब र भारतको साउदन समिति कलकता बिच पहिलो खेल हुन लागेको जानकारी गराए ।

फागुन २८ गते सम्म चल्ने रमपम विराट गोल्ड कप फुटबल प्रतियोगितामा नेपालका ८ र भारतका २ गरी १० टिमको सहभागिता रहेको संयोजक रिजालले जानकारी गराए ।

विराट गोल्ड कप फुटबल ट्रष्टका अध्यक्ष किशोरबहादुर शाहीले प्रतियोगिताका विजेताले ११ लाख, उपविजेताले ५ लाख रुपैयाँ पुरस्कार प्राप्त गर्ने बताए । यसैगरी  सर्वोकृष्ट खेलाडीले ५१ हजार, उत्कृष्ट प्रशिक्षकले १५ हजार, उत्कृष्ट गोल रक्षकले १५ हजार, सर्वाधिक गोल कर्ता खेलाडीले १५ हजार र प्रत्येक दिन खेलको उत्कृष्ट खेलाडीले ११ हजार रुपैयाँ पुरस्कार प्राप्त गर्ने छन् । फागुन १९ गतेदेखि २८ गतेसम्म प्रत्येक साँझ ६ः३० बजेदेखि ९० मिनेटको फुटबल प्रतियोगिताको खेल हुनेछ ।

फुटबल प्रतियोगिताको खेल सुरु हुनुभन्दा अगाडि आयोजकले राष्ट्रिय कलाकारको प्रस्तुति रहने ४५ मिनेटको सांस्कृतिक कार्यक्रम  मार्फत दर्शकलाई मनोरञ्जन प्रदान गर्नेछ । समग्रमा २ सय रुपैयाँको सिजनल टिकट काटेर विराटनगरको शहिद रंगशालामा प्रवेश गर्ने दर्शकले सांस्कृतिक कार्यक्रम र फुटबल प्रतियोगिता हर्न २ घण्टा ३० मिनेटको समय बिताउन पाउने छ ।

नेपाली कांग्रेसका वरिष्ठ नेता एवं संघिय सांसद डा. शेखर कोइरालाले रमपम विराट गोल्ड कप फुटबल प्रतियोगिताको उद्घाटन गर्ने कार्यक्रम रहेको छ ।