• ब्रह्मदेव यादव, विराटनगर ३६२  पटक हेरिएको

बिहिबार, फाल्गुण ०८, २०८१ समय : १६:२९:०२ , १ महिना अगाडि

कोशी प्रदेश खेलकुद विकास बोर्डका पदाधिकारी र सदस्यहरूले खेलकुदमा बेग्लाबेग्लै मापदण्ड मान्य नहुने अडान लिएका छन् । कोशी प्रदेश खेलकुद विकास बोर्डका पदाधिकारी सहित सदस्यहरूको फागुन ६ गते मंगलबार सामाजिक विकास मन्त्रालयमा बसेको बैठकले खेलकुद क्षेत्रमा पदाधिकारी नियुक्तिमा बेग्लाबेग्लै मापदण्ड मान्य नहुने विषयमा छलफल भएको समाचार सूत्रले जानकारी गराएको छ ।

बैठकमा सहभागी एक जना बोर्ड सदस्यले भने– युवा तथा खेलकुद मन्त्रालयमा पदाधिकारी नियुक्तिको विषयमा बेग्लाबेग्लै मापदण्ड किन भन्ने विषयमा प्रश्न उठेको छ । थप छलफल पछि ऐन र नियम परिमार्जन गरेर अगाडि बढ्ने सहमति भएको छ । युवा तथा खेलकुद मन्त्रालयले अब राष्ट्रिय खेलकुद परिषद् र कोशी खेलकुद विकास बोर्डमा पदाधिकारी नियुक्तिका लागि एउटै मापदण्डको आधारमा अगाडि बढ्नु पर्छ ।

राष्ट्रिय खेलकुद परिषद्का सदस्य सचिव नियुक्ति गर्दा शैक्षिक योग्यता बि.ए. पास अनिवार्य गरिएको छ । उमेरको समय सीमा तोकिएको छैन । तर कोशी प्रदेश खेलकुद विकास बोर्डमा सदस्य सचिव नियुक्ति गर्दा शैक्षिक योग्यता हटाइएको छ । र उमेरको समय सीमा ६० वर्ष तोकिएको छ ।

कोशी प्रदेश खेलकुद विकास बोर्डका सदस्य प्रदिप भगत थारुले चिरफार डटकम सँग कुरा गर्दै भने– युवा तथा खेलकुद मन्त्रालयले केन्द्रमा राष्ट्रिय खेलकुद परिषद् नाम राख्ने तर कोशी प्रदेशमा खेलकुद विकास बोर्ड नाम राखेका छन् । केन्द्रमा परिषद् र प्रदेशमा बोर्ड किन राखिएको भन्ने विषयमा प्रदेशमा वृहत रूपमा छलफल भएको छ । र यसलाई परिमार्जन गर्न सरकार समक्ष पत्राचार गरिएको भगतले बताए ।