• ब्रह्मदेव यादव, विराटनगर १९८  पटक हेरिएको

मंगलबार, पुष ०२, २०८१ समय : १५:४६:२७ , १९ घन्टा अगाडि

विराटनगरमा आयोजित महानगर रोजगार मेलाको ३ हजार ५ सय जनाले अवलोकन गरेका छन् । विराटनगर महानगरपालिकाले वैदेशिक पलायनलाई केही हदसम्म रोक्न र बेरोजगार युवा युवतीलाई रोजगार उपलब्ध गराउने उद्देश्यका साथ पुस १ र २ गते गरी दुई दिने महानगर रोजगार मेलाको आयोजना गरेका थिए ।

उद्योग, व्यापार, स्वास्थ्य संस्था, शिक्षण संस्था, होटेल रेस्टुरेन्टबाट ३ सय १९ जना रोजगार माग हुन आएकोमा १ सय ६१ जनालाई रोजगार मेलाबाट नै अन्तर्वाताको लागि सम्बन्धित संस्थामा पठाइएको विराटनगर महानगरपालिका रोजगार सेवा केन्द्रका प्रमुख इन्जिनियर कपिल थापाले बताए ।

विराटनगरमा रहेका स्वास्थ्य संस्थाबाट धेरै संख्यामा स्टाफ नर्सको माग आएको थियो । तर रोजगार मेलामा स्टाफ नर्सको फारम भर्नेको संख्या न्यून रहेको इन्जिनियर थापाले बताए । पछिल्लो समय स्टाफ नर्स विदेश पलायन भएपछि विराटनगरका स्वास्थ्य संस्थालाई दक्ष प्राविधिक अर्थात स्टाफ नर्सको माग बढेको छ ।

विराटनगरका साना साना स्वास्थ्य संस्थामा थोरै रकममा काम गरिरहेका स्टाफ नर्स पछिल्लो समय ठुलो स्वास्थ्य संस्थामा जागिर खान पुगेपछि साना स्वास्थ्य संस्थाहरू बन्द हुने अवस्थामा पुगेका छन् । महिनाको १५ देखि २० हजार रुपैयाँमा काम गर्ने स्टाफ नर्सहरू यतिखेर ठुलो स्वास्थ्य संस्थामा ५० देखि ६० हजार रुपैयाँ तलब लिएर काम गरिरहेका छन् । तर पनि ठुलो स्वास्थ्य संस्थामा स्टाफ नर्सको खाँचो यथावत छ ।

विराटनगर महानगरपालिकाले २०८० मा आयोजना गरेको पहिलो रोजगार मेलामा १ सय ९७ जना बेरोजगार युवा युवतीलाई रोजगार उपलब्ध गराएको थियो । २०८० मा ३ हजार २ सय जनाले रोजगार मेलाको अवलोकन गरेका थिए । विराटनगर महानगरपालिकाका मेयर नागेश कोइराला र उपमेयर शिल्पा निराला कार्कीले सोमबार दोस्रो महानगर रोजगार मेला २०८१ को उद्घाटन गरेका थिए ।