- ब्रह्मदेव यादव, विराटनगर ५३१ पटक हेरिएको
बुधबार, चैत्र १४, २०८० समय : १६:२१:४० , ८ महिना अगाडि
बिहीबारदेखि विराटनगरमा विराट गोल्डकप फुटबल प्रतियोगिता सुरु हुँदैछ । यस अघि समिति मार्फत हुँदै आएको फुटबल प्रतियोगिताको यस वर्ष विराट गोल्डकप ट्रष्टले आफै आयोजना गर्दैछ । ट्रष्टले बुधबार विराटनगरमा पत्रकार सम्मेलन गरेर फुटबल प्रतियोगिताको सम्पूर्ण तयारी पुरा भएको जानकारी गराएको छ ।
ट्रष्टका अध्यक्ष तथा फुटबल प्रतियोगिता आयोजक समितिका अध्यक्ष किशोरबहादुर शाहीले २०८० साल चैत्र १५ देखि २४ गतेसम्म विराटनगर स्थित शहिद रंगशालमा आयोजना हुन लागेको फुटबल प्रतियोगितामा नेपालका ७, भारतका २ र भुटानका १ गरी ३ देशका १० टोलीको सहभागिता रहेको जानकारी गराएको छ । प्रतियोगिताको विजेता टोलीले ११ लाख र उपविजेता टोलीले ५ लाख ५० हजार नगद सहित शिल्ड प्राप्त गर्ने छन् ।
प्रतियोगितामा उत्कृष्ट प्रशिक्षकलाई नगद २१ हजार, उत्कृष्ट गोल रक्षकलाई नगद २१ हजार, सर्वाधिक गोल कर्तालाई नगद २१ हजार, प्रत्येक दिन खेलको उत्कृष्ट खेलाडीलाई नगद ११ हजार र सर्वोकृष्ट खेलाडीलाई मोटरसाइकल पुरस्कार प्रदान गर्ने अध्यक्ष शाहीले बताए । प्रतियोगिता सम्पन्न गर्न १ करोड १८ लाख ३४ हजार रुपैयाँ खर्च हुनेछ । विराट गोल्डकप ट्रष्टले टिकट बिक्रीबाट ५० देखि ६० लाख कोशी प्रदेश सरकारबाट २५ लाख, विराटनगर महानगरपालिकाबाट १२ लाख, राष्ट्रिय खेलकुद परिषद्बाट ५ लाख र विभिन्न प्रयोजकबाट ३० देखि ३५ लाख रुपैयाँ प्राप्त हुने ट्रष्टका कोषाध्यक्ष अनुज बानियाले बताए ।
विराट गोल्डकप ट्रष्टले फुटबल प्रतियोगिताको दुई मुख्य प्रायोजक एसियन थाइफुड्स र एनआईसी एसिया बैंकबाट ६/६ लाख, प्रायोजक पेपे पिज्जाबाट ५ लाख, सहप्रायोजकबाट २ लाख र उपप्रायोजकबाट १ लाख रुपैयाँ प्राप्त गर्नेछ । पत्रकार सम्मेलनमा विराट गोल्डकप ट्रष्टका अध्यक्ष किशोरबहादुर शाही, उपाध्यक्ष किशोरबहादुर तिम्सिना, महासचिव विनेश बस्नेत, सचिव ध्रुर्व सिग्देल, कोषाध्यक्ष अनुज बानिया, सहकोषाध्यक्ष बिमल राज भण्डारी, लगायत सदस्यहरूको सहभागिता रहेको थियो ।
