• ब्रह्मदेव यादव, विराटनगर १७१८  पटक हेरिएको

मंगलबार, पुष २४, २०८० समय : १५:११:४२ , ११ महिना अगाडि

विराटनगर–१२ पाञ्चालीस्थित श्री लक्ष्मी नारायण मन्दिरका पिठाधीश स्वमी अच्युत प्रपन्नाचार्यलाई भारत अयोध्या राम मन्दिरको उद्घाटन समारोहमा सहभागिता जनाउन निम्तो आएको छ । भारतको उत्तर प्रदेश राज्यको अयोध्यामा विशाल राम मन्दिरको निर्माण भएको छ । र त्यही राम मन्दिरको २०८० साल माघ ८ गते अर्थात सन् २०२४, २२ जनवरीका दिन भव्य रुपमा उद्घाटन हुँदैछ ।

भारतका प्रधानमन्त्री नरेन्द्र मोदीले भव्य समारोहका बिच राम मन्दिरको उद्घाटन गर्ने कार्यक्रम तय गरिएको छ । अयोध्या स्थित राम मन्दिर ट्रष्टको निम्तो बाड्ने जिम्मेवारी पाएको हिन्दु स्वयंसेवक संघ नेपाल पदाधिकारीहरूले मंगलबार स्वामी अच्युत प्रपन्नाचार्यलाई श्री लक्ष्मी नारायण मन्दिरमै पुगेर निम्तो गरेका थिए ।

हिन्दु स्वयंसेवक संघ नेपालका केन्द्रिय सहसचिव महेन्द्रप्रसाद साह र संघका विराटनगर शाखाका प्रचारक मुकेश साह निम्तो लिएर स्वामी प्रपन्नाचार्य कहाँ पुगेका थिए । मंगलबार चिरफार डटकम सँग कुरा गर्दै स्वामी अच्युत प्रपन्नाचार्यले भारतको अयोध्या स्थित राम मन्दिरको उद्घाटन समारोहमा २० जनवरीसम्म पुग्ने गरी जाने तयारी भई रहेको बताए ।