• चिरफार डटकम, विराटनगर ६०८  पटक हेरिएको

शुक्रबार, साउन १२, २०८० समय : १८:३८:४५ , १ वर्ष अगाडि

बेदराज पौडेल, नेपाल प्रेस यूनियन मोरङको अध्यक्ष पदमा निर्वाचित भएका छन् । शुक्रबार यूनियनको विराटनगरमा सम्पन्न निर्वाचनबाट संस्थापन इतर समूहका पौडेलले झिनो मतको अन्तरले संस्थापन समूहका सुशिला पाठकलाई पराजित गर्दै अध्यक्ष पदमा निर्वाचित भएको हो । पौडेलले ६७ र पाठकले ६१ मत प्राप्त गरेका हुन् । खुल्ला उपाध्यक्ष तर्फ पौडेल समूहका पर्शुराम (प्रशान्त निरौला) निर्वाचित भए । निरौलाले ६७ मत प्राप्त गरी विजयी भए भने संस्थापन समूहका जितेन्द्र नारायण ठाकुर ५० मत प्राप्त गरी पराजित भए ।

समावेशी उपाध्यक्ष तर्फ संस्थापन समूहका दिलिप अग्रवाललाई पराजित गरेर पौडेल समूहका सोनुकुमार दास निर्वाचित भए । दासले ७५ र अग्रवालले ५३ मत प्राप्त गरेका थिए । सचिवमा पौडेल समूहबाट गोपाल पोखरेल निर्वाचित भए । ८४ मत ल्याएर पोखरेल निर्वाचित हुँदा ४३ मत ल्याएर संस्थापन समूहका धिरज दाहाल पराजित भए । कार्यसमितिको अधिकांश पदमा पौडेल समूहले सान्दार जित निकालेका छन् ।